Fokus Grupi mbi Ekstremizmin Politik në Prizren – Reflektim i Hapur mbi Dialogun Demokratik dhe Retorikën Ekstremiste

Më 25 korrik 2025, në ambientet e ITP Park në Prizren, Qendra Kosovare për Studime të Sigurisë (QKSS) organizoi një fokus grup në kuadër të projektit ndërkombëtar OppAttune – Kundërshtimi i Ekstremizmit Politik përmes Dialogut të Harmonizuar, i financuar nga programi Horizon Europe.

Ky aktivitet kishte për qëllim mbledhjen e mendimeve, përvojave dhe perceptimeve të qytetarëve për ekstremizmin politik në Kosovë – me theks të veçantë në sfidat që lidhen me diskursin publik, manipulimin politik, gjuhën e urrejtjes dhe mundësitë për dialog demokratik.

👥 Në këtë fokus grup morën pjesë 12 individë me profile të ndryshme – aktivistë të shoqërisë civile, qytetarë të angazhuar dhe përfaqësues lokalë – të cilët ndanë në mënyrë të hapur qëndrimet dhe reflektimet e tyre.

📌 Disa nga temat e diskutuara përfshinë:

• Mungesa e dëgjimit aktiv në debatet publike dhe zëvendësimi i tij me monologje të njëanshme;
• Roli i manipulimit mediatik dhe politik në deformimin e realitetit dhe zhvendosjen e vëmendjes nga problemet reale;
• Përhapja e gjuhës së urrejtjes përmes rrjeteve sociale dhe ndikimi i llogarive fallco në nxitjen e polarizimit;
• Vështirësitë që përballin gratë në jetën politike dhe mungesa e mbështetjes për përfaqësim të denjë;
• Shkëputja ndërmjet qytetarëve dhe institucioneve si pasojë e mungesës së transparencës dhe përfshirjes reale në vendimmarrje;
• Si mund të promovojmë kritika konstruktive dhe të shmangim turpërimin publik si formë e retorikës politike.

Diskutimi theksoi se ndarja sociale, mungesa e edukimit qytetar dhe mungesa e vlerave kolektive janë disa nga faktorët që po ushqejnë rritjen e polarizimit politik. U theksua gjithashtu nevoja për moderim profesional në debatet publike dhe për ndërtimin e një kulture politike të bazuar në respekt, etikë dhe dëgjim aktiv.

QKSS falënderon të gjithë pjesëmarrësit për kontributin e tyre të sinqertë dhe reflektimet e vlefshme. Të dhënat e mbledhura nga ky aktivitet do të përdoren për analiza të mëtejme dhe për hartimin e rekomandimeve konkrete që do t’i kontribuojnë ndërtimit të një hapësire më demokratike dhe gjithëpërfshirëse për qytetarët në Kosovë.

OppAttune është një projekt i financuar nga Horizon-Europe që përfshin 17 partnerë në të gjithë Evropën dhe më gjerë, i cili synon të zhvillojë një Model inovativ të Akordimit i cili do të gjurmojë, harmonizojë dhe kufizojë përhapjen e narrativave ekstreme politike. Bashkëfinancuar nga Bashkimi Evropian me Marrëveshjen e Grantit Nr. 101095170.