23/09/2025
Viti, 22 shtator 2025 – Qendra Kosovare për Studime të Sigurisë (QKSS) organizoi një tryezë të rrumbullakët në Viti, duke bashkuar zyrtarë lokalë, përfaqësues të shoqërisë civile, edukatorë, udhëheqës të rinisë dhe aktorë të mediave për të diskutuar ndikimin e dezinformatave në marrëdhëniet ndëretnike.
Gjatë tryezës, QKSS prezantoi gjetjet e raportit të saj të fundit Si e nxit dezinformata radikalizimin etno-politik në Kosovë, autorë: Gentiana Paçarizi, Dr. Ramadan Ilazi dhe Pia-Katharina Pallasch, me kontribute nga Denora Gashi.
Pjesëmarrësit theksuan se shpesh mediat mbështeten në burime të paverifikuara dhe u mungon transparenca si në financa ashtu edhe në standardet redaktoriale, çka kontribuon në përhapjen e dezinformatave. Mbyllja e mediave lokale dhe mungesa e korrespondentëve u identifikuan gjithashtu si dobësi kryesore, duke lënë qytetarët të varur nga burime të centralizuara ose të bazuara jashtë vendit.
Pavarësisht këtyre sfidave, diskutimi nxori në pah traditën e harmonisë shumetnike në Viti dhe përgjegjshmërinë e fortë institucionale si faktorë të rëndësishëm të rezistencës. Kryetari i Komunës, Sokol Haliti, u zotua se komuna do të ndërmarrë masa proaktive për të kundërshtuar dezinformimin dhe për të mbështetur bashkëpunimin ndëretnik.
Dr. Ramadan Ilazi, Drejtor i Hulumtimit në QKSS, tha: “Dezinformata minon besimin mes komuniteteve, por rezistenca lokale dhe reagimi i fortë institucional, siç shihet në Viti, tregojnë se është e mundur të kufizohet ndikimi i saj. Angazhimi në nivel komuniteti është thelbësor për ndërtimin e një rezistence afatgjatë.”
Ky aktivitet u zhvillua në kuadër të projektit DISRUPT – Dezinformata, Radikalizim dhe Shpërfaqja e Tensioneve Politike në Kosovë.
